ስለ ኢንሹራንስ | GOALGOOLE | Because you need Information for your goals !
7023 Bole Kifle Ketema, Addis Ababa, Ethiopia
0116616179/85 mcc@ethionet.et

ስለ ኢንሹራንስ

አንቀጽ ፫ 
ስለ ኢንሹራንስ

ምዕራፍ ፩ ጠቅላላ ውሳኔዎች

ቊ ፮፻፶፬ ትርጓሜ፡፡
(፩) የኢንሹራንስ ውል ፖሊሲ ማለት ኢንሹራንስ ሰጪ የሚባለው በአንድ ወይም በብዙ የተመደበውን የኢንሹራንስ መግቢያ ዋጋ (ፕሬምዮም) ተቀብሎ በውሉ የተመለከተው አደጋ በደረሰ ጊዜ ኢንሹራንስ ለገባው ሰው የተወሰነ ገንዘብ ለመክፈል ግዴታ የሚገባበት ውል ነው፡፡
(፪) ኢንሹራንሱ የተደረገው ስለ ጉዳት የሆነ አንደ ሆነ፤ የኢንሹራንስ ውል ግዴታ በንብረት ላይ የሚደርሰውን አደጋ ወይም ኢንሹራንስ የገባው ሰው የሚደርስበትን የፍትሐ ብሔር ኅላፊነትም ይጨምራል፡፡
(፫) ኢንሹራንሱ ለሰው ሕይወት የሆነ እንደ ሆነ፤ የኢንሹራንሱ ግዴታ፤ በሞት፤ በሕይወት ወይም በአካል ጉዳት ወይም በሕመም የሚደርሰውን አደጋ ይጨምራል፡፡
ቊ ፮፻፶፭ የዚህ አንቀጽ ተፈጻሚነት ወሰን
(፩) የዚህ አንቀጽ ውሳኔ ተፈጻሚ የሚሆነው በመሬት፤ በወንዝና በአየር ለሚደርሱ አደጋዎች ነው፡፡
(፪) ይህ ውሳኔ በባሕር ሕግ የሚተዳደረውን የባሕርን ኢንሹራንስ ወይም የሶሺያልንና የክሬዲት (መንግሥት የሚያቋቋመው) ኢንሹራንስን አይመለከትም፡፡
ቊ ፮፻፶፮ ስለ ኢንሹራንስ ማኅበሮች፡፡
የኢንሹራንስ ሥራ ለመሥራት የተፈቀደላቸው ማኅበሮችና ሰዎች ለመሥራት የሚችሉት የኢንሹራንስ ሥራ በሕግ ይወሰናል፡፡

ምዕራፍ ፪ ልዩ ልዩ ለሆኑ ኢንሹራንስ ማኅበሮች ተፈጻሚ የሚሆኑ ድንጋጌዎች
ክፍል ፩ የኢንሹራንስ ፖሊሲ ውል

ቊ ፮፻፶፯ የኢንሹራንስ ውል ማስረጃ፡፡
(፩) የኢንሹራንስ ውል በኢንሹራንስ ውል ፖሊሲ በሚባል ጽሑፍ መደገፍ አለበት፡፡
(፪) የኢንሹራንስ ፖሊሲ ተጨማሪ በሆነ ጽሑፍ ካልሆነ በቀር ሊለወጥ አይቻልም፡፡
(፫) ስለሆነም ፖሊሲው ወይም የፖሊሲው ተጨማሪ ጽሑፍ ከመፈረሙ በፊት ለጊዜው ኢንሹራንስ ሰጪው ኢንሹራንስ ለሚገባው ሰው ፖሊሲው ወይም ለፖሊሲው ተጨማሪ ጽሑፍ እስከ ተፈረመ ድረስ ማረጋገጫ መድን የሚሆነው ጽሑፍ የሰጠው እንደ ሆነ፤ ኢንሹራንስ ሰጪውና ኢንሹራንስ ገቢው አንዱ ለአንዱ ግዴታ እንደገቡ ይቆጠራል፡፡
ቊ ፮፻፶፰ በኢንሹራንስ ውል ፖሊሲው ላይ ስለሚመለከቱ ነገሮች፡፡
በኢንሹራንስ ውል ፖሊሲ ውስጥ ሊጻፍ የሚገባው፤
(ሀ) የተዋዋሉበት ስፍራና ቀን፤
(ለ) የተዋዋዮቹ ስምና አድራሻ፤
(ሐ) ኢንሹራንሱ የተደረገለት ንብረት፤ አላፊነት ወይም ኢንሹራንስ የገባ ሰው፤
(መ) ኢንሹራንሱ የተገባበት አደጋ ዐይነት፤
(ሠ) የዋስትናው ገንዘብ መጠን፤
(ረ) ለኢንሹራንስ መግቢያ የሚከፈለው ገንዘብ ልክ፤
(ሰ) የውሉ ዘመን ነው፡፡
ቊ ፮፻፶፱ የኢንሹራንሱ ውል መጽናት የሚጀመርበት ጊዜ፡፡
(፩) ተቃራኒ ውሳኔ ከሌለ በቀር የኢንሹራንስ ውል ፖሊሲው ከተፈረመበት ጊዜ አንስቶ ይጸናል፡፡
(፪) ስለሆነም የኢንሹራንስ ወል ተፈጻሚነቱን የሚጀምረው የመጀመሪያው መደብ የኢንሹራንሱ መግቢያ ገንዘብ ሲከፈል ብቻ ነው ተብሎ ለመዋዋል ይቻላል፡፡
ቊ ፮፻፷ ለታዘዘለት የሚል የኢንሹራንስ ውል ፖሊሲ፡፡
(፩) የኢንሹራንስ ውል ፖሊሲ በአንድ የተለየ ሰው ስም ወይም ለታዘዘለት ሰው ሊሆን ይችላል፡፡
(፪) የኢንሹራንስ ሰጪው በመጀመሪያው ተጠቃሚ ላይ ማቅረብ የሚችለው መከራከሪያውን የኢንሹራንስ ጥቅም በተዛወረለት ወይም በጀርባ በተፈረመለት ጥቅሙን ባገኘ ሰው ላይ ሊያቀርብ ይችላል፡፡
ቊ ፮፻፷፩ ስለ ሦስተኛ ወገን የሚደረግ የኢንሹራንስ ውል ፖሊሲ፡፡
(፩) የኢንሹራንስን ውል በወኪል ለመዋዋል ይቻላል፡፡
(፪) ገንዘብ ከፋዩ ወኪል ባይሆንም የኢንሹራንሱን ውል ለሦስተኛው ወገን መዋዋል ይችላል፡፡ ተጠቃሚው ሰው የኢንሹራንሱን ውል ያጸደቀው እንደ ሆነ፤ በውሉ ሊጠቀምበት ይችላል፡፡ ስለሆነም ለውሉ የተነገረው አደጋ ከደረሰም በኋላ ውሉን ከመቀበል የሚያግደው ነገር የለም፤ በውሉ ተጠቃሚ የሆነው ሰው ውሉን እተቀበለ ድረስ ገንዘብ ከፋዩ ሰው በውሉ ላይ የተመለከተውን ግዴታ ኅላፊነት ሁሉ መፈጸም አለበት፡፡
ቊ ፮፻፷፪ ተለይቶ ላልታወቀ ለሦስተኛ ወገን የሚደረግ የኢንሹራንስ ውል፡፡
(፩) የኢንሹራንስ ውል ተለይቶ ላልታወቀ ለሦስተኛ ሰው ሊደረግ ይቻላል፡፡ ይህም በተባለው የወደፊት ተጠቃሚ ስም ሆኖ እንደ ተደረገ የሚቆጠር ነው፡፡
(፪) በንኡስ ቁጥር ፩ መሠረት የኢንሹራንስን ውል የፈረመው ሰው ለኢንሹራንስ ሰጪው የሚከፈለውን ገንዘብ መክፈል አለበት፡፡ ኢንሹራንስ ሰጪው የኢንሹራንስን ውል ፈራሚ በሆነው ሰው ላይ ማቅረብ የሚችለውን መከራከሪያ በኢንሹራንሱ ውል ተጠቃሚ በሆነው ሰው ላይም ማቅረብ ይችላል፡፡

ክፍል ፪ የተዋዋዮቹ መብቶችና ግዴታዎች

ቊ ፮፻፷፫ ኢንሹራንስ ሰጪው መድን የሚሆንበት አደጋ፡፡
(፩) የኢንሹራንስ ሰጪው በውሉ ለተመለከተው አደጋ ኢንሹራንስ ለገባው ሰው መድን ይሆናል፡፡
(፪) ተቃራኒ ውል ካልኖረ በቀር ኢንሹራንስ በገባው ሰው ቸልተኝነትና ባልታሰበ አደጋ ለሚደርሰው የጉዳት ካሣ መድን ነው፡፡
(፫) ተቃራኒ ውል ቢኖርም ኢንሹራንስ ገቢው ዐውቆ በሚያደርገው ጥፋት ለሚደርሰው ጉዳት ኢንሹራንስ ሰጩው መድን ሊሆን አይችልም፡፡
ቊ ፮፻፷፬ ኢንሹራንስ የገባው ሰው ኅላፊ የሚሆንባቸው ሰዎች ስለሚያደርጉት ጥፋት፡፡
(፩) ኢሹራንስ የገባው ሰው ኅላፊ የሚሆንባቸው ሰዎች ባደረጉት ጥፋት ምክንያት ለሚደርስ ጉዳትና ኪሣራ ኢንሹራንስ ሰጪው መድን ነው፡፡
(፪) የተደረገው ጥፋት ዐይነትና ክብደት ሳይታይ በንኡስ ቁጥር 1 የተጻፈው ድንጋጌ ተፈጻሚ ይሆናል፡፡
ቊ ፮፻፷፭ የኢንሹራንስ ሰጪው ግዴታ፡፡
(፩) ኢንሹራንስ ሰጪው በውሉ ውስጥ የተመለከተው አደጋ በደረሰ ጊዜ ወይም በውሉ ውስጥ የተስማሙበት ቀን በደረሰ ጊዜ የተስማሙበትን ገንዘብ በውሉ በተወሰነው ቀን መክፈል ይገባዋል፡፡
(፪) ኢንሹራንስ ሰጪው የሚከፍለው ገንዘብ መጠን በውለታው ላይ ከተጠቀሰው አይበልጥም፡፡
ቊ ፮፻፷፮ ለኢንሹራንስ መግቢያ ስለሚከፈለው ገንዘብ፡፡
(፩) ኢንሹራንስ ገቢው ለኢንሹራንስ መግቢያ የሚከፈለውን ገንዘብ በውሉ ላይ በተወሰነው ቀን መክፈል ግዴታው ነው፡፡
(፪) ተቃራኒ ስምምነት ቢኖርም እንኳ ተጠቃሚው ለኢንሹራንስ መግቢያ የሚከፈለውን ገንዘብ በተወሰነው ጊዜ ባለመክፈሉ ብቻ ውሉን ለማፍረስ አይቻልም፡፡ ኢንሹራንስ ሰጪው ገንዘቡ እንዲከፈለው መጠየቅ አለበት፡፡
(፫) ተቃራኒ ስምምነት ቢኖርም እንኳ ኢንሹራንስ ሰጪው በንኡስ ቁጥር ፪ መሠረት ገንዘቡ እንዲኪፈለው ጥያቄ ካደረገ ካንድ ወር በኋላ ገንዘቡ ሳየከፈለው ቢቀር ውሉ ይታገዳል፡፡
(፬) የአንድ ወር ጊዜ ካለፈ በኋላ ኢንሹራንስ ሰጪው ተጠቃሚው ለኢንሹራንስ መግቢያ የሚከፈለውን ገንዘብ እንዲከፈለው ወይም ውሉ እንዲፈርስ ለመጠየቅ ይቻላል፡፡
(፭) የኢንሹራንሱ ገንዘብ የተከፈለ እንደ ሆነ፤ ውሉ ገንዘቡ በተከፈለበት ቀን እንደ ገና የጸና ይሆናል፡፡
(፮) የዚህ ቁጥር ውሳኔዎች ስለ ሕይወት ለተደረገ ኢንሹራንስ ተፈጻሚዎች አይሆኑም፡፡
ቊ ፮፻፷፯ ውሉ በተደረገ ጊዜ ስለሚሰጥ መግለጫ፡፡
ውሉን በሚዋዋልበት ጊዜ ኢንሹራንስ ገቢው የሚያውቃቸውን ማናቸውንም ሁኔታዎችና ኢንሹራንስ ሰጪው ኅላፊነት የሚወስድባቸውን አደጋዎች ለማመዛዘን የሚያስችሉትን ማናቸውንም ሁኔታዎች በትክክል መግለጥ አለበት፡፡
ቊ ፮፻፷፰ ስለ ተሸሸጉ ነገሮችና ስለ ሐሰት መግለጫዎች፡፡
(፩) ኢንሹራንስ የገባው ሰው እያወቀ እውነቱን ነገር የሸሸገ ወይም የሐሰት መግለጫ የሰጠ እንደ ሆነ፤ እውነተኛው ነገር ተገልጾለት ቢሆን ኖሮ ኢንቩራንስ ሰጪው ይህን ውል አይዋዋልም፤ ወይም ተጠቃሚው ከፍ ያለ ገንዘብ እንዲከፍል የሚያደርግለት ውል ይዋዋል ነበር እስከሚያሰኝ ድረስ እነዚህ የተሸሸጉ ነገሮችም በሐሰት የተሰጡ መግለጫዎች የኢንሹራንስ ሰጪውን የአደጋውን አስተያየት ለውጠውበት እንደ ሆነ፤ ውሉ ፍርስ ይሆናል፡፡ ኢንሹራንስ ሰጪውም ስለ ኢንሹራንስ መግቢያ የተከፈለውን ገንዘብ ያስቀራል፡፡
(፪) ተቃራኒ ስምምነት ቢኖርም እንኳ መሸሸጉ ወይም የሐሰት መግለጫው ሆነ ብሎ ያልተደረገ እንደ ሆነና፤ ኢንሹራንስ ገቢውም በመጥፎ ልቡና ያደረገው መሆኑን ማስረዳት ያልተቻለ እንደ ሆነ፤ ውሉ አይፈርስም፡፡
(ሀ) መሸሸጉ ወይም የሐሰት መግለጫ መሰጠቱ አደጋው ከመድረሱ በፊት የተገለጸ እንደ ሆነ ኢንሹራንስ ሰጪው ለኢንሹራንስ ገቢው ማስታወቂያ ከሰጠ ከአንድ ወር በኋላ ውሉን ለማፍረስ ወይም የኢንሹራንስ መግቢያ ገንዘብ ተጨምሮ ውሉ እንዲቀጥል ለማድረግ ይቻላል፡፡
(ለ) የተሸሸገ ነገር ወይም በሐሰት የተሰጠ መግለጫ መሆኑ የታወቀው አደጋው ከደረሰ በኋላ የሆነ እንደ ሆነ፤ ሊደርስ የሚችለው አደጋ በሙሉና በትክክል ተገልጾ ቢሆን ኖሮ ለኢንሹራንስ ሊከፈል ይገባ በነበረውና በአሁኑ ጊዜ በተከፈለው ኢንሹራንስ መግቢያ ገንዘብ መካከል ያለው ልዩነት ታይቶ ኢንሹራንስ ሰጪው ለኪሣራ የሚከፍለው ገንዘብ በዚሁ ልክ ተቀናሽ ይሆናል፡፡
ቊ ፮፻፷፱ ሊደርስ የሚችለው አደጋ እየከበደ የሄደ መሆኑን ስለ መግለጽ፡፡
(፩) ሊደርስ የሚችለው አደጋ እየከበደ መሄዱ ውሉ በተደረገ ግዜ አደጋው በዚህ ሁኔታ እየከበደ የሚሄድ መሆኑ ቢታወቅ ኖሮ ኢንሹራንስ ሰጪው የማይዋዋል መሆኑ ወይም ቢዋዋልም ኢንሹራንስ ገቢውን ከፍ ያለ ኢንሹራንስ መግቢያ ገንዘብ አስከፍሎ ይዋዋል ነበር የሚያሰኝ ሆኖ ሲገኝ ኢንሹራንስ በገባው ሰው ምክንያት ሲሆን አደጋው እየጨመረ እንዲሄድ ያደረገው ሁኔታ በተደረገ በዐሥራ አምሰት ቀን ውስጥ ወይም ይህን ድርጊት ኢንሹራንሰ ገቢው ካወቀበት ከዐሥራ አምስት ቀን በማይበልጥ ጊዜ ወስጥ ኢንሹራንስ ገቢው ለኢንሹራንስ ሰጪው ማስታወቅ አለበት፡፡ ይህ ጊዜ በኢንሹራንስ ውል ሊቀነስ አይቻልም፡፡
(፪) ኢንሹራንስ ሰጪው ውሉን ለማፍረስ ወይም ለኢንሹራንስ የሚከፈለውን ገንዘብ ጨምሮ ውሉ እንዲጸና (እንዲቆይ) ለማድረግ ይችላል፡፡
(፫) ኢንሹራንስ የገባው ሰው በንኡስ ቁጥር ፩ በተነገረው መሠረት ለኢንሹራንስ ሰጪው ባያስታውቅ (ባይገልጽ) ወይም ትክክለኛ መግለጫ ሳይሰጥ ሲቀር በቁጥር ፮፻፷፰ የተጻፈው ድንጋጌ ተፈጻሚ ይሆናል፡፡
(፬) የዚህ ቁጥር ድንጋጌዎች ስለ ሕይወት በተደረገ ኢንሹራንስ ተፈጻሚዎች አይሆኑም፡፡
ቊ ፮፻፸ አደጋን ስለ ማስታወቅ፡፡
(፩) ከዐቅም በላይ በሆነ ኅይል ምክንያት ያልቻለ መሆኑን ካላስረዳ በተቀር ኢንሹራንስ የገባው ሰው ኢንሹራንስ ሰጪው መድን የሆነበት አደጋ መድረሱን እንዳወቀ ወዲያውኑ ወይም እጅግ ቢዘገይ በአምስት ቀን ውስጥ ለኢንሹራንስ ሰጪው ማስታወቅ አለበት፡፡
(፪) ይህን የተባለውን ቀን በውል ማሳጠር አይቻልም፡፡
ቊ ፮፻፸፩ ስለ መክሠር፡፡
(፩) ኢንሹራንስ ተጠቃሚ የሆነ ሰው የከሠረ እንደ ሆነ፤ የኢንሹራንሱ ውል በዚህ ምክንያት አይፈርስም፤ ንብረት ጠባቂዎቹ በውሉ ተጠቃሚና ለኢንሹራንስ መግቢያ ስለሚከፈለው ገንዘብ ባለዕዳ ሆነው የኢንሹራንሱ ውል ጸንቶ ይቆያል፡፡
(፪) ስለሆነም ንብረት ጠባቂዎችና ኢንሹራንስ ሰጪው ከሠረ ተብሎ ፍርድ ከተፈረደበት ቀን አንሥቶ በሦስት ወር ውስጥ ውሉን ማፍረስ ይችላል፡፡
(፫) ኢንሹራንስ ሰጪው የከሠረ እንደ ሆነ፤ ከሠረ ተብሎ ከተፈረደበት ቀን አንሥቶ በአንድ ወር ውስጥ ውሉ ያልቃል፡፡
ቊ ፮፻፸፪ የኢንሹራንሱ ተጠቃሚ የሆነው ሰው መሞት፡፡
(፩) ተቃራኒ የውል ቃል ቢኖርም እንኳ የኢንሹራንስ ተጠቃሚ የሆነው ሰው ሲሞት የኢንሹራንሱ ውል መብት ወደ ወራሾች ተላልፎ ይቀጥላል፡፡
(፪) ስለሆነም ወራሾቹና ኢንሹራንስ ሰጪው በኢንሹራንሱ ተጠቃሚ የሆነው ሰው ከሞተበት ቀን አንሥቶ በሦስት ወር ጊዜ ውስጥ ውሉን ለማፍረስ ይችላሉ፡፡
ቊ ፮፻፸፫ ኢንሹራንስ የተደረገለትን ነገር ስለ ማስተላለፍ፡፡
(፩) ኢንሹራንስ የተደረገለት ነገር ለሌላ በተላለፈ ጊዜ ተቃራኒ የውል ቃል ቢኖርም እንኳ የኢንሹራንሱ ውል በሙሉ መብት ለተላለፈ ለት ሰው ይቀጥላል፡፡
(፪) ስለሆነም ንብረቱ የተላለፈለትና ኢንሹራንስ ሰጪው ኢንሹራንስ የተደረገበት ነገር ለሌላ ከተላለፈበት ቀን አንሥቶ በሦስት ወር ጊዜ ውስጥ ውሉን ሊያፈርሱ ይችላሉ፡፡

ክፍል ፫ ስል ይርጋ
ቊ ፮፻፸፬ ይርጋ፡፡
(፩) በአሹራንስ ውል ምክንያት የሚቀርብ ማንኛውም ክስ የሚታገደው ለክሱ ምከንያት የሆነው ጉዳት ከተደረገበት ወይም በጉዳዩ ጥቅም ያላቸው ወገኖች ጉዳቱን ካወቁበት ቀን ጀምሮ ከሁለት ዓመት በኋላ ነው፡፡
(፪) የተሸሸገ ወይም በሐሰት ቃል የቀረበ ጉዳይ ያጋጠመ ሲሆን የይርጋው ዘመን የሚታሰበው ኢንሹራንስ ሰጪው ይህንን ነገር ካለቀበት ቀን ጀምሮ ነው፡፡
(፫) ይህን ይርጋ የተወሰነውን ጊዜ በውል ለማሳጠር አይቻልም፡፡

ምዕራፍ ፫ ስለ ጉዳት ኪሣራ ኢንሹራንስ
ክፍል ፩ የዕቃዎች ኢንሹራንስ

ቊ ፮፻፸፭ ኢንሹራንስ ለማድረግ ስለ መቻሉ፡፡
(፩) ዕቃውን ከጉዳት ለመጠበቅ የሚፈልግ ማንኛውም ሰው ኢንሹራንስ ሊያስገባው ይችላል፡፡
(፪) ጉዳት እንዳይደርስ በማለት ማንኛውም ቀጥተኛ ወይም ቀጥተኛ ያልሆነ ጥቅም ሁሉ፤ ኢንሹራንስ ሊገባበት ይቻላል፡፡
ቊ ፮፻፸፮ አላፊነት የሚያስከትሉ ጉዳዮች፡፡
(፩) ኢንሹራንስ ሰጪው ከውጭ አገር ጋራ በተደረገ ጦርነት ወይም በአገር ውስጥ በሆነ የእርስ በርስ ጦርነት በመነሣቱ ምክንያት ለሚደርሰው ጉዳት ወይም ጥፋት አላፊ ለመሆን ካልተዋዋለ በቀር አላፊነት የለበትም፡፡
(፪) ጥፋቱ ወይም ጉዳቱ የደረሰው በንኡስ ቁጥር 1 በተመለከቱት ምክንያቶች ነው ሲል ማስረዳት ያለበት ኢንሹራንስ ሰጪው ነው፡፡
ቊ ፮፻፸፯ የዕቃው መጥፋት፡፡
ኢንሹራንስ የገባው ዕቃ በኢንሹራንስ ውል ውስጥ ባልተመለከተ ምክንያት የጠፋ እንደ ሆነ፤ ውሉ እንዲፈረስ ያደርገዋል፡፡
ቊ ፮፻፸፰  ካሣ፡፡
ኢንሹራንስ የገባ ዕቃ ውል ማለት ዕቃው ኢንሹራንስ የገባበት ካሣ የመጠየቂያ ውል ነው፤ ካሣውም ኢንሹራንስ የገባው ዕቃ ጉዳት በደረሰበት ቀን ከሚያወጣው ዋጋ አይበልጥም፡፡
ቊ ፮፻፸፱ ኢንሸራንስ የገባው ዕቃ ዋጋ ኢንሹራንስ ከተደረገበት ዋጋ የበለጠ ሲሆን፡፡
ኢንሹራንስ የገባው ዕቃ ጉዳት በደረሰበት ቀን ያወጣ የነበረው ዋጋ ኢንሹራንስ ከገባበት ዋጋ በልጦ ሲገኝ፤ በልጦ ለሚገኘው ዋጋ ኢንሹራንስ ገቢው ራሱ እንደ ኢንሹራንስ አድራጊ ተቆጥሮ ከጉዳቱ በመጠኑ በከፊል ይችላል የተባለውን ውሳኔ በውል ለማስቀረት ይቻላል፡፡
ቊ ፮፻፹ ኢንሹራንስ የገባው ዕቃ ኢንሹራንስ ከተደረገበት ዋጋ ያነሰ ሲሆን፡፡
(፩) በኢንሹራንስ ውል ውስጥ የተጠቀሰው ካሣ ኢንሹራንስ ከገባው ዕቃ ዋጋ ሲበልጥና ከተዋዋዮቹ አንደኛው ወገን አታሎ ወይም አጭበርብሮ ሲገኝ ሌላው ወገን ውሉ እንዲፈርስ ለማድረግ ከመቻሉም በላይ ኪሣራ ለመጠየቅ ይችላል፡፡
(፪) ማታለልና ማጭበርበር የሌለበት እንደ ሆነ፤ የኢንሹራንስ ውል እንደ ጸና የሚቆየው ኢንሹራንስ ለገባው ዕቃ እውነተኛ ዋጋ ብቻ ነው፡፡
(፫) በኢንሹራንስ ገቢው ጥያቄ ኢንሹራንሱ የተቀነሰ እንደ ሆነ ኢንሹራንስ ገቢው ለወደፊቱ ለኢንሹራንሱ በየጊዜያቱ የሚከፈለው ሒሳብ ዝቅ ይላል፡፡ ነገር ግን ቅናሹ ከመደረጉ በፊት ለኢንሹራንሱ በየጊዜያቱ የተከፈለውን ሒሳብ ኢንሹራንስ ሰጪው ለማስቀረት መብት አለው፡፡
ቊ ፮፻፹፩ ተደራራቢ ኢንሹራንስ፡፡
(፩) አያሌ ኢንሹራንስ ሰጪዎች አንዳንዱን ዕቃ ለአንዱ ዐይነት ጉዳት ኢንሹራንስ በመስጠታቸው ኢንሹራንስ የገባው ዕቃ ዋጋ ኢንሹራንስ ከተደረገበት ዋጋ የበለጠ ሲሆን እያንዳንዱ የኢንሹራንስ ሰጪ በኢንሹራንስ ገቢው በኩል ማታለል ከተደረገ ውሉ እንዲፈርስና ኪሣራም እንዲከፈለው መጠየቅ ይችላል፡፡
(፪) ኢንሹራንስ የገበው ሰው በቅን ልቡና ያደረገው እንደ ሆነ፤ አደጋ በደረሰ ጊዜ እያንዳንዱ ኢንሹራንስ ሰጪ ስለ ኢንሹራንሱ በተዋዋለበት ሒሳብ መጠን ካሣ ከፋይ ይሆናል፡፡
ቊ ፮፻፹፪ ኢንሹራንስ የገባው ዕቃ ስለ መጥፋቱ፡፡
(፩) ኢንሹራንስ በገቡበት ጊዜ ከጉዳት እንዲጠበቅ የተፈለገው ዕቃ አስቀድሞ የጠፋ ሆኖ ቢገኝ ወይም አደጋ የማይደርስበት የሆነ እንደ ሆነ፤ የኢንሹራንሱ ውል አይጸናም፤ ኢንሹራንስ የገባው ባለጥቅሙ ሰው በየጊዜያቱ ለኢንሹራንሱ የከፈለው ሒሳብ ይመለስለታል፡፡
(፪) በመጥፎ ልቡና የተደረገ ሲሆን ማንኛውም ወገን ኪሣራ ይከፍላል፡፡
ቊ ፮፻፹፫ ኢንሹራንስ ሰጪው በምትክነት ስለ መግባት፡፡
(፩) ኢንሹራንስ ሰጪው በከፈለው ካሣ መጠን ጉዳቱ እንዲደርስ ባደረጉት ሦስተኛ ወገኖች ላይ ክስ ለማቅረብ ኢንሹራንስ ለገባው ሰው በተከፈለው ገንዘብ መጠን ባሉት መብቶችና ክሶች ኢንሹራንስ ሰጪው ምትክ ሆኖ ይገባል፡፡
(፪) ኢንሹራንስ ገቢው ባደረገውም ምክንያት ኢንሹራንስ ሰጪው በንኡስ ቁጥር 1 እንደተመለከተው በኢንሹራንስ ገቢው ምትክ ለመተካት ያልቻለ እንደ ሆነ፤ የኢንሹራንስ ሰጪው አላፊነት በሙሉ ወይም በከፊል ይቀርለታል፡፡
(፫) ስለሆነም ሌላ ተቃራኒ የውል ቃል ቢኖርም በክፋት ያደረጉት ካልሆነ በቀር ኢንሹራንስ ሰጪው በኢንሹራንስ ገቢው ወደ ታች የሚቆጠሩ ተወላጆች ወደ ላይ የሚቆጠሩ ወላጆች ወኪሎች ሠራተኞች ወይም ከእርሱ ጋራ ዘወትር አብረው በሚኖሩት ሰዎች ላይ ክስ ለማቅረብ አይችልም፡፡
ቊ ፮፻፹፬ የቀዳሚነት ልዩ መብት ወይም የመያዣ መብት ያላቸው ገንዘብ ጠያቂዎች፡፡
(፩) ተቃራኒ የውል ቃል ቢኖርም እንኳ ለአንድ ንብረት የሚከፈለው የኢንሹራንስ ገንዘብ በዚሁ ንብረት ላይ የቀዳሚነት ወይም የመያዣ መብት ላላቸው ገንዘብ ጠያቂዎች ይሰጣል፡፡ እነዚህ ገንዘብ ጠያቂዎች በኢንሹራንስ ሰጪው ላይ በቀጥታ ክስ ማቅረብ ይችላሉ፤ እርሱም ደግሞ ኢንሹራንስ በገባው ሰው ላይ ሊያቀርብ ይችል የነበረውን መከላከያ ሊያቀርብ ይችላል፡፡
(፪) ኢንሹራንስ ሰጪው ዕቃው በብድር መያዣ መሰጠቱን ባለማወቅ ለተጠቃሚው ከፍሎ ቢገኝ አከፋፈሉ የጸና ይሆናል፡፡

ክፍል ፪ የኅላፊነት ኢንሹራንስ
ቊ ፮፻፹፭ ኢንሹራንስ ሰጪው አላፊ የሚሆንበት፡፡
በኢንሹራንሱ ውል ውስጥ የተጠቀሰው ጉዳት በደረሰ ጊዜ ጉዳት የደረሰበት ሦስተኛ ወገን ኢንሹራንስ በገባው ሰው ላይ በፍርድ ቤት ወይም በስምምነት ጥያቄ ካላደረገ በቀር ኢንሹራንስ ሰጪው በአላፊነት አይጠየቅም፡፡
ቊ ፮፻፹፮ አላፊነትን ስለ ማመን፡፡
(፩) ኢንሹራንስ ሰጪው ሳይኖር የተደረገ አላፊነትን ማመን ወይም የተደረገ ግልግል በኢንሹራንስ ሰጪው ላይ መከራከሪያ አይሆንበትም የሚል የስምምነት ቃል ለማድረግ ይቻላል፡፡
(፪) የተፈጸመው የሁኔታ ማመን አላፊትን ማመን ነው ተብሎ ሊቆጠር አይችልም፡፡
ቊ ፮፻፹፯ ስለ ክሱ አመራር፡፡
(፩) ጉዳት የደረሰበት ወገን ለአላፊነት የሚያቀርበውን የፍትሐ ብሔር ክስ መሪ ለመሆን ኢንሹራንስ ሰጪው የተዋዋለው የውል ቃል ይጸናል፡፡
(፪) በመጀመሪያ ተጠቃሚ ላይ የቀረበበት የወንጀል ክስ ሲሆን ማንኛውም የወንጀል ጉዳይ ኢንሹራንስ ሰጪው የሚመራ ለመሆኑ የተጻፈ የውል ቃል አይጸናም፡፡ ኢንሹራንስ ገቢው አቤቱታ የማቅረብ መብቱን ሊሠራበት ወይም ሊተወው ይችላል፡፡
ቊ ፮፻፹፰ ጉዳት ለደረሰበት ወገን በቀደምትነት ስለ መክፈል፡፡
(፩) ጉዳት ለደረሰበት ሦስተኛ ወገን ኢንሹራንስ ሰጪው በሚከፍለው ኪሣራ ሒሳብ ልክ ካሣውን እሰኪከፍለው ድረስ ኢንሹራንስ ሰጪው ኢንሹራንስ ለገባው ሰው ካሣ አይከፍልም፡፡
(፪) የዚህን ቁጥር ውሳኔ ተቃራኒ የሆነ ማናቸውም የውል ቃል አይጸናም፡፡

ምዕራፍ ፬ ጠቅላላ ድንጋጌዎች

ቊ ፮፻፹፱ ኢንሹራንስ የተገባበትን የገንዘብ ልክ በፈቃድ ስለ መወሰን፡፡
ስለ ሰዎች የተደረገ የኢንሹራንስ ውል እንደ ጉዳት ካሣ ውል የሚቆጠር አይደለም፡፡ ኢንሹራንስ የተገባበት ገንዘብ በኢንሹራንስ ውል ወስጥ በነጻ የሚወሰን ሆኖ ኢንሹራንስ የገባው ሰው የደረሰበት ጉዳት ሳይገመት ሊከፍል ይገባዋል፡፡
ቊ ፮፻፺ መተካት የማይቻል ስለ መሆኑ፡፡
ተቃራኒ የውል ቃል ቢኖርም ስለ ሰዎች ኢንሹራንስ ስምምነት ተደርጎበት የነበረውን ሒሳብ ለባለውሉ ወይም ለተጠቃሚው የከፈለ ኢንሹራንስ ሰጪ፤ ጉዳት እንዲደርስ ባደረጉት ወገኖች ላይ በእነርሱ መብት ተትክቶ ክስ ሊያቀርብ አይችልም፡፡

ክፍል ፪ ስለ ሕይወት ኢንሹራንስ
ቊ ፮፻፺፩ ትርጓሜ፡፡
የሕይወት ኢንሹራንስ ማለት ባለኢንሹራንሱ አንድ ጊዜ ወይም ከአንድ ጊዜ በበለጠ ስለ ኢንሹራንስ የሚከፍለውን ገንዘብ ተቀብሎ በተዋዋዩ ወይም ኢንሹራንስ በተገባበት ሦስተኛ ወገን ሕይወት ወይም ሞት ጋራ የተያያዙ አንዳንድ ሁኔታዎች በደረሱ ጊዜ፤ የተወሰነ ገንዘብ ለተዋዋዩ ወይም ለተጠቃሚው ለመክፈል የሚዋለው ውል ነው፡፡
ቊ ፮፻፺፪ ስለ ሕይወት ኢንሹራንስ፡፡
(፩) የሕይወት ኢንሹራንስ የሚዋዋለው ኢንሹራንስ ሰጪ ኢንሹራንስ የገባው ሰው በኢንሹራንሱ ውል ውስጥ በተወሰነ ጊዜ በሕይወት ያለ እንደ ሆነ፤ የተወሰነ ዋና ገንዘብ በሕይወት እስካለ ድረስ ወይም በየጊዜው የሚከፈል ገንዘብ  ለመክፈል ነው፡፡
(፪) ኢንሹራንስ ሰጪው የተዋዋለው ኢንሹራንስ ስለገባው ሰው ሞት የሆነ እንደ ሆነ ኢንሹራንስ ከገባው ሰው መብት ላላቸው ወይም በኢንሹራንስ ውል ውስጥ ለተጠቀሰው ተጠቃሚ የተወሰነ ዋና ገንዘብ ወይም በሕይወት እስካለ ድረስ በየጊዜው የሚከፈል ገንዘብ ኢንሹራንስ የገባው ሰው በሞተ ጊዜ ለመክፈል ነው፡፡
(፫) ኢንሹራንስ ሰጪው በንኡስ ቁጥር 1 እና በንኡስ ቁጥር 2 የተጠቀሱትን ለመክፈል ግዴታ የገባ ሲሆን የተጣመረ የኢንሹራንስ ውል መዋዋል ይቻላል፡፡
ቊ ፮፻፺፫ ሦስተኛ ወገን የሚያደርገው የሕይወት ኢንሹራንስ፡፡
የሞተ እንደ ሆነ፤ ተብሎ ኢንሹራንስ በገባለት አንድ ሰው ላይ የኢንሹራንስ ውል ሦስተኛ ወገን ሊዋዋል ይችላል፡፡ ኢንሹራንስ የተገባለት ሰው የኢንሹራንስን ገንዘብ ልክ ከሚያመለክት ቃል ጋራ በጽሑፍ ስምምነቱን ካልሰጠ በቀር ውሉ ፍርስ ነው፡፡ ኢንሹራንስ የተገባለት ሰው ያገባ የሆነ እንደ ሆነ ተጋቢውም በውሉ እንዲስማማ ያስፈልጋል፡፡
ቊ ፮፻፺፬ ችሎታ በሌለው ሰው ላይ ስለሚደረግ ኢንሹራንስ፡፡
ችሎታ የሌለው ሰው ወይም  እንደራሴው ቢስማማም የሞተ እንደ ሆነ ተብሎ ችሎታ በሌለው ሰው ላይ የሚደረግ የኢንሹራንስ ውል ፍርስ ነው፤ ማንኛውም ጥቅም ያለው ሰው ባቀረበው ጥያቄ የኢንሹራንስ ውል እንዲፈርስ ይደረጋል፤ ለኢንሹራንስ መግቢያ የተከፈለውም ገንዘብ በሙሉ መመለስ አለበት፡፡
ቊ ፮፻፺፭ ስለ ሕይወት ኢንሹራንስ ውል ፖሊሲ ዝርዝር፡፡
የሕይወት ኢንሹራንስ ውል ፖሊሲ ቁጥር ፮፻፶፰ ከተመለከተው ዝርዝር ሐተታ በቀር፤ ተጨማሪ፤
(ሀ) ስለ ሕይወት ኢንሹራንስ የተደረገለት ሰው የግል ስም የቤተዘመድ ስምና የተወለደበትን ቀን፤
(ለ) ተጠቃሚው ተለይቶ የታወቀ እንደ ሆነ፤ የተጠቃሚው ቤተ ዘመድ ስምና የግል ስም፤
(ሐ) የተስማሙበት ገንዘብ እንዲከፈል የሚደረግበት ሁኔታ፤
(መ) ቅናሽ የሚደረግበትና መልሶ የሚገዛበት ሁኔታ፤ በኢንሹራንስ ፖሊሲ ውስጥ በትክክል መገለጽ አለበት፡፡
ቊ ፮፻፺፮ ለታዘዘለት የሚል የኢንሹራንስ ውል፡፡
የሕይወት ኢንሹራንስ ፖሊሲ ለታዘዘለት የሚል የሆነ አንደ ሆነ፤ በውሉ ጀርባ ላይ የተደረገው ፊርማ የተጠቃሚው ስምና ቀን ከሌለበት ዋጋ የለውም፡፡
ቊ ፮፻፺፯ የኢሹራንሱን ውል መያዣ ስለ ማድረግ፡፡
ለታዘዘለት የሚል የሕይወት ኢንሹራንስ ውል በተጨማሪ ስምምነት ወይም ለታዘዘለት በሚለው የኢንሹራንስ ውል ጀርባ ላይ ስለዚሁ ጉዳይ በመፈረም ወይም በፍትሐ ብሔር ሕግ በቁጥር ፪ሺ፰፻፷፮ መሠረት ማያዣ ማድረግ ይቻላል፡፡
ቊ ፮፻፺፰ መያዣ ለማድረግ ወይም ለማስተላለፍ ኢንሹራንስ የገባው ሰው ስምምነት አስፈላጊ ስለመሆኑ፡፡
ኢንሹራንስ የገባው ሰው በጽሑፍ ካልተስማማ የኢንሹራንስን ውል ለሌላ ለማዛወር ወይም በጀርባው ላይ በመፈረም ጥቅምን ለሌላ ማሳለፍ፤ ወይም በመያዣነት መስጠት ወይም በውሉ ውስጥ ተገልጾ የተመለከተውን ተጠቃሚ መለወጥ ዋጋ የለውም፡፡
ቊ ፮፻፺፱ ራስን ስለ መግደል፡፡
(፩) ተቃራኒ ስምምነት ቢኖርም እንኳ ለሕይወት የሚደረግ ኢንሹራንስ፤ ኢንሹራንስ የገባው ሰው ሆነ ብሎ ራሱን የገደለ እንደ ሆነ፤ ኢንሹራንሱ ዋጋ የለውም፤ ሆነ ብሎ ራሱን የገደለ መሆኑን ማስረዳት ያለበት ኢንሹራንስ ሰጪው ነው፡፡
(፪) ሆነ ብሎ ራሱን ያልገደለ መሆኑን ተጠቃሚው ማስረዳት የቻለ እንደ ሆነ፤ የኢንሹራንሱ ውል ዋጋ ያለው ይሆናል፡፡
ቊ ፯፻ ገዳዩ ተጠቃሚው ሲሆን፡፡
ኢንሹራንስ የሕይወት በሆነ ጊዜ ኢንሹራንስ የገባውን ሰው፤ ተጠቃሚው ሆነ ብሎ የገደለው እንደ ሆነ፤ በዚሁም በወንጀል ፍርድ ቤት የተፈረደበት እንደ ሆነ፤ የኢንሹራንሱ ውል ዋጋ የለውም፡፡
ቊ ፯፻፩ ለሞት በሆነ ኢንሹራንስ ተጠቃሚ የሆነ ሰው፡፡
(፩) ለሞት የሚደረግ ኢንሹራንስ ለአንድ የተለየ ተጠቃሚ ጥቅም ሊደረግ ይቻላል፡፡
(፪) ስማቸው በውሉ ላይ ተለይቶ ባይቀጠስም፤
(ሀ) ጋብቻው የተደረገው የኢንሹራንሱ ውል ከተፈረመ በኋላም ቢሆን እንኳ የኢንሹራንሱን ውል የፈረመው ሰው ባል ወይም ሚስት፤
(ለ) የኢንሹራንሱ ውል ሲፈረም የተወለዱት የኢንሹራንሱ ውል ፈራሚ ሰው ልጆች፤ ተለይተው የታወቁ ተጠቃሚዎች ተብለው ይቆጠራሉ፡፡
(፫) በኢንሹራንሱ ውል ውሰጥ የተለየ ተጠቃሚ ያልተጠቀሰ እንደ ሆነ፤ ወይም የተጠቀሰው ተጠቃሚ ውሉን አልቀበልም ያለ እንደ ሆነ፤ የኢንሹራንሱን ውል የተዋዋለው በኑዛዜ የኢንሹራንሱን ውል በተጨማሪ ጽሑፍ ወይም ለተዘዘለት የሚለውን ኢንሹራንስ ውል በጀርባው ላይ በመፈረም አንድ ተጠቃሚ መምረጥ ወይም በአንዱ ተጠቃሚ ሌላ ምትክ ተጠቃሚ መተካት ይችላል፡፡
ቊ ፯፻፪ የኢንሹራንሱ ገንዘብ ሊጠየቅ በሚቻልበት ጊዜ የተጠቃሚው በሕይወት መኖር፡፡
ሌላ ስምምነት ካልኖረ በቀር ለተጠቃሚው የሚከፈለው ዋና ገንዘብ ወይም በየጊዜው በሕይወት እስካለ ድረስ የሚከፈለው ገንዘብ ሊጠየቅ በሚቻልበት ጊዜ ተጠቃሚው በሕይወት መኖር አለበት በሚል ሁናቴ የሚከፈል ሆኖ ይቆጠራል፡፡
ቊ ፯፻፫ ተጠቃሚው እንዲስማማ አስፈላጊ ስለ መሆኑ፡፡
(፩) ለአንድ ተለይቶ ለታወቀ ተጠቃሚ የተሰጠ የንሹራንስ ውል ተጠቃሚው እንዲቀበል መፍቀዱን ካሰታወቀ በኋላ ሊሻር አይቻልም፡፡
(፪) በውሉ ውስጥ ተለይቶ የተጠቀሰው ተጠቃሚ እቀበላለሁ ብሎ እስካስታወቀ ድረስ ተዋዋዩ ተጠቃሚውን መለወጥ ይችላል፡፡
ቊ ፯፻፬ በባለኢንሹራንሱ ላይ ስለሚሰጠው የመቃወም ውጤት፡፡
ኢንሹራንስ ሰጪው ያወቀው ካልሆነ በቀር የተጠቃሚው ፈቃደኛ መሆን ወይም የተጠቃሚው ጥቅሙን አልፈልግም ብሎ መሻር በኢንሹራንስ ሰጪው መቃወሚያ ሆኖ ሊቀርብ አየችልም፡፡
ቊ ፯፻፭ ተጠቃሚው ሳይለይ የተደረገ ኢንሹራንስ፡፡
ተጠቃሚው ተለይቶ ያልታወቀ እንደ ሆነ፤ ወይም ተሽሮ እንደ ሆነ፤ ወይም በሕይወት የሌለ በመሆኑ ውድቅ የሆነ እንደ ሆነ፤ ስለ ሞት የተደረገው የኢንሹራንስ ዋናው ገንዘብ የሚከፈለው ኢንሹራንሱን ለተዋዋለው ሰው ውርስ ነው፡፡
ቊ ፯፻፮ ስለ ተጠቃሚው መብት፡፡
(፩) ተጠቃሚው ኢንሹራንስ ሰጪውን በቀጥታ መጠየቅ ይችላል፡፡
(፪) ለተጠቃሚው የሚከፈለው ገንዘብ ኢንሹራንስ ከገባው ሰው ውርስ ክፍል አይሆንም፡፡ ተጠቃሚው ፈቃደኛ መሆኑን ያስታወቀ ኢንሹራንስ የገባው ሰው ከሞተ በኋላ እንኳ የኢንሹራንሱ ውል ከተፈረመበት ጊዜ ጀምሮ ባለመብት እንደ ሆነ ይቆጠራል፡፡
(፫)  ለተዋዋይ ባል ወይም ሚስት የሚከፈለው ገንዘብ ለዚያው ባል ወይም ሚስት የግል ንብረት እንደ ሆነ ይቆጠራል፡፡
ቊ ፯፻፯ መልሶ ስላለመክፈል፡፡
ለተጠቃሚው የሚከፈለው ገንዘብ ለውርሱ ተመልሶ እንዲገባ ወይም ተጠቃሚው በውርስ ከሚያገኘው ድርሻው ላይ ተቀናሽ ሊሆን አይችልም፡፡
ቊ ፯፻፰ ስለ ገንዘብ ጠያቂዎች መብት፡፡
(፩) ኢንሹራንስ ከገባው ሰው ላይ ገንዘብ ጠያቂ የሆኑ ሰዎች ለተጠቃሚው ከሚከፈለው ገንዘብ ላይ መብት የላቸውም፡፡
(፪) ኢንሹራንስ የገባው ሰው በከሠረ ጊዜ በዘህ ሕግ በቁጥር ሺ፳፱
(ሀ) የተጻፈው ድንጋጌ ተፈጻሚ አይሆንም፡፡
ቊ ፯፻፱ ስላልተከፈለ የኢንሹራንስ መግቢያ ገንዘብ፡፡
(፩) ባለኢንሹራንስ ስለ ሕይወት የሚከፍለው የኢንሹራንስን መግቢያ ገንዘብ እንዲከፈለው ለማስገደድ ክስ ማቅረብ አይችልም፡፡
(፪) ስለሆነም በየዓመቱ ለሦስት ዓመት ጊዜ አከፋፈል የተመደቡ ገንዘቦች ያነሰ የተከፈለ ሆኖ፤ በየዓመቱ የሚከፈለው ገንዘብ በተወሰነው ጊዜ ያልተከፈለ እንደ ሆነ፤ ኢንሹራንስ ሰጪው እንዲከፈለው መጠየቅና ጠይቆም ለማግኘት ያልቻለ እንደ ሆነ፤ ጥያቄ ካደረገ ከአንድ ወር በኋላ ውሉን ማፍረስ ይችላል፡፡ ይህን ጊዜ በኢንሹራንስ ውል ለማሳጠር አይችልም፡፡
(፫) በየዓመቱ ለሦስት ዓመት ጊዜ አከፋፈል የተመደቡ የኢንሹራንስ ገንዘቦች ከተከፈሉና በየዓመቱ የሚከፈለው ገንዘብ በተወሰነው ጊዜ ያልተከፈለ እንደ ሆነ፤ ኢንሹራንስ ሰጪው እንዲከፈለው ከጠየቀበት ጊዜ አንሥቶ በአንድ ወር ውስጥ ያልተከፈለ እንደ ሆነ የኢንትራንሱ ውል ውድቅ አይሆንም፡፡ ባለኢንሹራንሱ ማድረግ የሚችለው ለተከፈለው ገንዘብ የኢንሹራንስ ውል ፖሊሲ መስጠት ወይም በውል የተስማሙበትን ዋና ገንዘብ ወይም በየጊዜው በሕይወት እስካለ ድረስ የሚከፈለውን ገንዘብ በቁጥር ፮፻፶፮ በተመለከተው መሠረት መቀነስ ብቻ ነው፡፡
ቊ ፯፻፲ መልሶ ስለ መግዛት፡፡
(፩) ተቃራኒ የውል ቃል ቢኖርም እንኳ በዓመት ለሦስት ጊዜ አከፋፈል የተመደበው የኢንሹራንስ ገንዘብ ከተከፈለ ኢንሹራንስ የገባው ሰው ስለ ሞት የተደረገውን የኢንሹራንስ ውል ፖሊሲ መልሶ ለመግዛት መጠየቅ ይችላል፡፡
(፪) መልሶ መግዣው ዋጋ የሚታሰብበትን ሁኔታ በቁጥር ፮፻፶፮ የተመለከተው ወሳኔ ቅናሹ የሚደረግበትን ሁኔታ የሚወስን ሊሆን ይችላል፡፡
(፫) በዚህ ቁጥር ውስጥ የሚገኙት ውሳኔዎች ለጊዜው ለተደረጉ ኢንሹራንስ ውሎች የጸኑ አይሆኑም፡፡

ክፍል ፫ ስለ አካል አደጋ ወይም ስለ ሕመም የሚደረግ ኢንሹራንስ
ቊ ፯፻፲፩ ኢንሹራንስ ስለ ተገባበት አደጋ፡፡
(፩ ) ስለ አካል አደጋ የሚደረግ የኢንሹራንስ ውል ፖሊሲ ማለት ኢንሹራንስ ሰጪው በኢንሹራንሱ ውል ተለይቶ በተወሰነው ጊዜ ወስጥ ኢንሹራንስ በገባው ሰው ላይ አደጋ የደረሰበት እንደ ሆነ፤ ኢንሹራንስ ለገባው ሰው ወይም ኢንሹራንስ የገባው ሰው የሞተ እንደ ሆነ በውሉ ውስጥ ለተጻፈው ተጠቃሚ አንድ የተወሰነ ገንዘብ ለመክፈል ግዴታ የገባበት ውል ነው፡፡
(፪) ባለኢንሹራንሱ መድንነቱን ለተወሰነ አደጋ ወይም አደጋው ስለሚያስከትለው የተወሰነ ነገር ብቻ ለይቶ መወሰን ይችላል፡፡
(፫) አደጋ ማለት ሳይታሰብ ከየትም የሚደርስ ማንኛውም የአካል ጉዳት ጭምር ነው፡፡
(፬)  ኢንሹራንስ ሰጩው ስለ ሕምም ኢንሹራንስ ውል ማድረግ ይችላል፡፡
ቊ ፯፻፲፪ ስለ ሕይወት ኢንሹራንስ የተሰጡት ውሳኔዎች ተፈጻሚዎች ስላለመሆናቸው፡፡
ስለ ሕይወት ኢንሹራንስ የተነገሩት የዚህ ምዕራፍ የክፍል ፪ ድንጋጌዎች ስለ አደጋ ወይም ስለ ሕመም በሚደረግ ኢንሹራንስ ላይ ተፈጻሚዎች አይሆኑም፡፡